- ايش شغل اخصائي العلاج التنفسي في المستشفى بالزبط ؟
اخصائي العلاج التنفسي يشتغل في اغلب الاماكن اللي في المستشفى زي العناية المركزة، الطوارئ، معامل النوم، غرف التنويم، بعض العمليات الجراحية، مراكز مكافحة التدخين، في كل مكان في المستشفى يتواجد ال RT يهتم في علاج وتشخيص امراض الجهاز التنفسي والاشياء اللي لها علاقة بالجهاز التنفسي.
- كيف حيكون الوضع في الجامعة في ظل وجود الدكاترة هل حنكون متغطين طول الوقت ولا كيف ؟
لا مو طول الوقت، الدكاترة لهم بوابات خاصه يدخلوا فيها عالقاعة ما يتمشوا في الممرات ابدًا يعني يتطلب الحجاب وقت المحاضرات فقط اما باقي الوقت الوضع عادي ، ولو فيه دكتور راح يمر من مكان معين مثلا تلاقي احد واقف ينبهك انو فيه دكتور او شي وهذا نادر يعني الدكاترة نشوفهم في المحاضرات فقط.
- هل اخصائيين العلاج التنفسي مهمشين في المستشفى ؟
مافي وظيفة مهمشة في المستشفى ، طال ما ان الوظيفة موجودة فهاذا دليل على ان المستشفيات بحاجة لها ولا ما كان فتح التخصص من الأساس، الكلام اللي حتسمعوه كثير ومن ناس قليلين خبرة لا تثق الا بالكلام اللي من ناس في نفس المجال ، كل وظيفة او تخصص بالمستشفى له اهميته والطاقم الطبي يكمل بعض مانقدر نستغني عن اي طرف.
- هل صحيح ان الدوام بعد التخرج طويل ومتعب ومو على قد الراتب ؟
دوام الاخصائيين يختلف حسب هو وين يشتغل مثلًا اللي يشتغل في معامل النوم غالبًا دوامه ٨ ساعات يوميًا ويكون الدوام بالليل ، وايضا في معامل وظائف الرئة الدوام يكون ٨ ساعات صباحًا، في حين ان اللي يشتغل في العناية المركزة والطوارئ وغرف التنويم، دوامه يكون ١٢ ساعة بحيث انه لازم يقفل من ١٤-٢٠ شفت في الشهر وهذا الامر يختلف حسب احتياج المستشفى. وعدد الشفتات اللي ذكرته يتقسم على ايام الشهر، للتوضيح اكثر( مثلًا: الاسبوع الاول الدوام يكون ٣ ايام اللي بعده ٤، اللي بعده ٣ والاخير ٥) كذا انت غطيت ١٥ شفت في الاسبوع وهذا المطلوب.
- من تجربتكم ايش رايكم بالايباد وهل احسن من الورق خصوصًا اذا ماني متعودة عليه ؟ وايش احسن ايباد تنصحونا فيه ؟
كلنا بالبداية تقريبًا كنا نستعمل الورق بس كانت اسوء طريقة الصراحة ، لان الكمية كبيرة والالتزام بالطباعة كل يوم موضوع يطفش غير ان فيه دكاترة يرسلوا السلايدات بنفس وقت المحاضرة فعشان كذا نصيحة الايباد افضلللللللل بمراحل ، ولو ماكنت متعود عليه مع الوقت بتحس انه مرا ممتاز وحتمشي معاه عشان كذا من الحين جمعوا فلوسكم واشتروا ايباد 😂♥️ ، اما بخصوص ايش افضل نوع ،الايباد مقاس 10.5 او 11 انش حاولوا تاخذو سعة كبيرة يعني 128 او 256 قيقا ،والقلم كمان مهم للناس اللي يحبوا يكتبوا ملاحظات مع الدكاترة وعشان وقت المذاكرة كمان .
- كيف حنسوي البرزنتيشن وقدام مين وع اي اساس التقييم ؟
الموضوع المرعب للجميع ، واحنا قبلكم كنا مرا شايلين همه بس سهالات مراااا لا تشيلوا هم ، بالنسبة للبرزنتيشن سوينا كل ترم واحد والمواضيع كانت مرتبة ١٥ موضوع وحسب ترتيب اسمائنا في الكشف يطلع كل شخص ايش موضوعه.
اول ترم سوينا لمادة الغازات الطبية (medical gas) مع دكتور هاجد كل طالبة مسؤولة عن جزئية عليه ١٠ درجات وكل طالبة ٨ دقايق بس.
الترم الثاني مادة امراض الجهاز التنفسي (respiratory disease ) برضو مع دكتور هاجد كل طالبة يطلعلها مرض ولازم تتكلم عنه بالتفصيل من اسباب واعراض وتشخيص وعلاج عليه ١٠ درجات برضو وكل طالبة ٢٠ دقيقة.
وهكذا.. كل ترم فيه موضوع مختلف
البرزنتيشن كله بالانجليزي العرض والشرح ،في البداية حتحسوا صعب وحتتوتروا بس اسبوع قبل البرزنتيشن جهز الكلام اللي حتقوله وتدرب علية كل يوم عيده مع نفسك ، واعرض قدام اهلك واصدقائك وحيكون مرااااا سهل عليك ، التدريب اهم شي ، ولا تشيل هم انه بالانقلش ابدا لو جهزت الكلام وحفظته وتدربت عليه كويس تقدر ان شاء الله ، غالبًا المواضيع تتحدد بداية الترم والعرض يصير اخر الترم يعني عندك فتره تجهزله بالراحه ، المحتوي تاخذه من اي مصدر مو مهم من وين من كتاب من النت حتي من السلايدات حقت المادة عادي ، المهم تعرضه بالشكل المناسب ، سهالات الموضوع نهائيًا لا تشيلوا هم .
- هل ضروري نشترك مع خصوصيين عشان نجيب درجات ؟
الوضع مختلف عن تمامًا عن التحضيري ، ما تحتاج خصوصي كل شي تقدر تذاكرة بنفسك المهم هو الجد والاجتهاد، والمذاكرة اول بأول، فكره انك تلم المنهج قبل الاختبار بيومين غير مممكنه. والمصادر اللي تساعدك متنوعة جدًا. اجتهد وفالك اعلى الدرجات
- ايش اهم المصادر ؟ وهل هي كثيرة وتشتت زي التحضيري ؟
المصادر في التخصص متنوعة جدًا وكلها مفيدة ورح تساعدك، اليوتيوب فيه بعض القنوات اللي ممكن تساعدك، الملخصات، الكتب، كل شي تحتاجة متوفر وسهل الحصول عليه. والمصادر هذي غالبًا هدفها تزويدك بمعلومات اضافية ممكن تساعدك في وصول المعلومة الاساسية بشكل افضل.
لكن كدراسة، كل مادة لها كتاب خاص وسلايدات تذاكر منه وتختبر فيه ، بعض الدكاترة يسوو Tutorials وهو عبارة عن محاضرة اضافية يحددو وقتها الدكاترة ويطلبو منكم تكونوا مذاكرين ويعطوكم اسئله تشبه الاختبار ويحلوها معاكم وتكون مهمه .
- كيف يكون الدوام حقنا بالجامعة متى يبدأ وينتهي ؟
ما نقدر نحدد بالزبط متى يبدأ وينتهي لأن يختلف حسب الجدول أو لو فيه عملي أو لا ، بس الشي الحلو انو بيد الليدر تقدروا تتفقوا وتزبطوه زي م تبغوا حتى تقدروا تحطو يوم off ، يعني مثلا لو فيه دكتور مارح يحضر يقدر الليدر يزبط مع الدكتور اللي بعد ويقدم محاضرته وتخلصوا بدري ، او لو مثلًا فيه يوم عندكم بريك طويل واليوم اللي بعدو فيه محاضره وعملي يصير يزبطه الليدر بحيث انه يقدم المحاضره ويخليها وقت اليوم اللي فيه بريك طويل واليوم اللي بعدو يصير فيه بس عملي والعملي ماينأخذ كل اسبوع وبكذا يصير عندكم off ، يعني تقدروا تزبطوه زي م يناسبكم ان شاء الله ، وغالبا الدوام مو طويل.
